«Առաքելական սերունդ» ծրագիր
«Առաքելական սերունդ» ծրագիրը ՔՆԱԶ ծրագրի առաջին փուլն է:
«Առաքելական սերունդ» ծրագրի նպատակն է երիտասարդներին առաջնորդել դեպի եկեղեցի` զինելով նրանց տեսական գիտելիքներով և գործնական հմտություններով: Ծրագիրը ներառում է տարբեր դասընթացներ, հանդիպումներ, ուխտագնացություններ եկեղեցականների հետ։ Մասնակիցները մեկ տարվա ընթացքում կարող են ընդհանուր գիտելիքներ ձեռք բերել Մայր եկեղեցու պատմության, ծեսերի և վարդապետության մասին: «Առաքելական սերունդ» ծրագիրը բաղկացած է հետևյալ երեք դասընթացներից.
«Ալֆա» դասընթաց
Սկսած 2005թ.` ԱԱԻ-ում պարբերաբար կազմակերպվում է «Ալֆա» դասընթաց, որը պարզ ու գործնական կերպով ներկայացնում է քրիստոնեական հավատքը և հետաքրքիր հնարավորություն է ընձեռում անդրադառնալու կյանքի իմաստին՝ դիտարկելով այն քրիստոնեական արժեհամակարգի լույսի ներքո: Դասընթացի խոսնակները Հայ Առաքելական եկեղեցու հոգևորականներ են: Ձևաչափը` շաբաթական մեկ հանդիպում 2.5 ժամ տևողոթյամբ, անկաշկանդ մթնոլորտում։ Տևողությունը 12 շաբաթ։ Դասընթացը ներառում է նաև եռօրյա արտագնա սեմինար:
«Ծանոթություն Ավետարաններին»
Այս դասընթացը տարրական գիտելիքներ է տալիս Աստվածաշունչ մատյանի կառուցվածքի, հեղինակների, բովանդակության մասին, և մասնակիցները միասին ընթերցում են չորս Ավետարանները՝ զուգահեռաբար ծանոթանալով եկեղեցական հայրերի որոշ մեկնությունների: Դասընթացի արդյունքում ավելի հետաքրքիր ու մատչելի է դառնում ոչ միայն Ավետարանների, այլև ընդհարապես Աստվածաշունչ մատյանի ընթերցանությունը, բովանդակային երկակի թվացող հարցերի պատասխանների որոնումը:
«Հայ Առաքելական եկեղեցու ավանդություն ու ծես»
Այս դասընթացի միջոցով երիտասարդները ձեռք են բերում գիտելիքներ եկեղեցում կատարվող ծեսերի և արարողությունների, դրանց բովանդակության և նպատակի մասին, ծանոթանում են եկեղեցու տոներին և կարողանում են ճշմարիտ քրիստոնեական հավատքը տարբերել աղանդներից՝ վերարժևորելով իրենց ազգային հոգևոր արժեքներն ու ավանդույթները: Այս դասընթացը վարում են Հայ Առաքելական եկեղեցու հոգևորականները:
«Առաքելական սերունդ» ծրագրի շրջանակներում կազմակերպվում են նաև ուխտագնացություններ դեպի հայաստանյան սրբավայրեր, որոնք ունեն ճանաչողական բնույթ: Նպատակն է երիտասարդներին ծանոթացնել Հայաստանի սրբավայրերին, դրանց պատմական ու մշակութային արժեքներին, խրախուսել մաքուր ու անաղարտ պահել Մայր եկեղեցին և հաստատուն մնալ հավատքի մեջ:
